«Атырау» директоры барлық ойыншылардан кету туралы өтініш талап етті

«Атырау» ФК бас директоры Дидар Сыдықбек КПЛ-дің 12-ші тур аясында «Ұлытаудан» 0:1 есебімен жеңілген соң командадағы алдағы өзгерістер туралы мәлімдеді.

«Ойыннан кейін барлығына өтініш жазуды айттым, содан кейін кімді қалдырып, кімді жіберу керектігін шешемін. Ертең Астанаға барамын, бас бапкер туралы жақсы жаңалықтар айтамын деп ойлаймын», — деді клуб басшысы өзінің телеграм-арнасында.

Басшы сондай-ақ 24 маусымда трансферлік терезе ашылғаннан кейін жаңа ойыншылар команда құрамына қосылатынын атап өтті — осы уақытқа дейін клуб тағы бір ойын өткізуі керек.

Қазіргі уақытта «Атырау» Қазақстан чемпионатының турнирлік кестесінде соңғы орында тұр.