Аты аңызға айналған Чех футболшысы Иржи Ярошик»Шахтер» ФК жаттықтырушылар штабына қосылды

Қарағандының «Шахтер» футбол клубы атақты чех маманы Иржи Ярошикті жаттықтырушылар штабының жаңа мүшесі ретінде таныстырды. Бұл туралы клубтың баспасөз қызметі хабарлады.

Иржи Ярошик – еуропалық футболда көптеген жетістіктерге жеткен тәжірибелі маман. Ол ойыншы ретінде «Челси» сапында Англия чемпионы атанып, Мәскеулік ЦСКА құрамында Ресей премьер-лигасын жеңіп алды, «Селтикпен» Шотландия чемпионы болды, сондай-ақ «Спарта Прага» командасында Чехия чемпионатында жеңіске жетті.

Футболшылық мансабын аяқтағаннан кейін, Ярошик бірнеше клубтарда бас бапкер ретінде қызмет етті. Оның жаттықтырушылық мансабында «Спарта Прага» (Чехия), «Ружомберок» (Словакия) және «Теплице» (Чехия) секілді командалар бар.

Ярошикпен бірге «Шахтердің» жаттықтырушылар құрамын тағы екі маман толықтырды: Петар Алексеевич пен Джозеф Муха. Бұдан бөлек, командада бұрыннан жұмыс істеп келе жатқан Андрей Финонченко, Игорь Маштаков және Сергей Ткачук өз міндеттерін жалғастырады.

Иржи Ярошик пен оның әріптестерінің келуі «Шахтер» клубы үшін маңызды қадам болмақ. Бұл өзгерістер жергілікті футбол дәстүрлерін байытумен қатар, клубқа халықаралық деңгейдегі тәжірибе әкеледі деп күтілуде.