«Атлетико» қорғаныста мықты, бірақ қазіргі «Барселона» кез келген қорғанысты қалтыратады – комментатор Испания Кубогының алдағы ойыны туралы

Сәуірдің 2-нен 3-не қараған түні Испания Кубогының жартылай финалының жауапты кездесуі өтеді. Мадридтің «Атлетикосы» азулы «Барселонаны» қабылдайды.

Бұл командалар арасындағы соңғы кездесулер жанкүйерлерді жоғары нәтижелілікпен қуантып келеді. Барселонада тартысқа толы өткен алғашқы жартылай финал ойыны тең нәтижемен аяқталды (4:4), ал бірнеше аптадан кейін Испания чемпионатының аясында Мадридте өткен матч 4:2 есебімен «Барселонаның» пайдасына шешілді.

Енді командалар Испания Кубогының ақтық сынына жолдама алу үшін таласады, онда оларды екі матчтың қорытындысы бойынша «Реал Сосьедадты» 5:4 есебімен тізе бүктірген «Реал Мадрид» күтуде.

Sport Plus Qazaqstan телеарнасының бас редакторы әрі белгілі комментатор Айбек Қабылша Sport Pulse тілшісіне алдағы кездесуден не күтетінін айтты:

«Қарымта кездесуде де қос команда гол соғады, бірақ матч Каталониядағыдай нәтижелі боларына сенімді емеспін. «Атлетико» өзіне тән ойын мәнерін ұстанып, қорғанысқа көңіл бөлсе, «Барселона» шабуылға басымдық береді.

Иә, «Атлетико» керемет қорғанады, бірақ қазіргі «Барселона» өте мықты. Ламин Ямаль мен Рафиньяның факторы биылғы маусымда кез келген испандық қорғанысты қалтыратып жүрген шабуыл шебі. Оған қоса, тәжірибелі Роберт Левандовский бар.

Менің ойымша, бұл ойында «Барселона» 2:1 есебімен жеңіске жетеді. Осылайша, финалда біз «эль-класиконы» көреміз».

Испания кубогының екінші жартылай финалы Мадридтегі «Метрополитано» стадионында өтеді. Кездесуге Андалусиядан келген төреші Хосе Мунуэра Монтеро төрелік етпек. Матч Қазақстан уақыты бойынша 00:30-да басталмақ, ал кездесуді тікелей эфирде Sport+ Qazaqstan арнасынан көруге болады.

Басты сурет: REUTERS/Albert Gea

Біздің парақшамыздан футбол матчтарының барлық нәтижелерін Live форматта бірінші болып біліңіз!