Асу Алмабаевқа жаңа қарсылас табылды

Қазақстандық UFC жекпе-жек шебері Асу Алмабаевтың австралиялық қарсыласы Стив Эрцег жекпе-жектен бас тартып, отандасымыз қарсылассыз қалған еді. Енді оған жаңа қарсылас табылғаны туралы ақпарат жарияланды. Бұл туралы 1bol.kz жазды.

2 наурыз күні UFC Vegas 103 турнирінде Алмабаев бразилиялық Аллан Насиментомен (20-6) кездеседі.

Насиментоның UFC-дегі дебюті 2021 жылғы 30 қазанда ресейлік Тагир Уланбековке қарсы өткен. Үш раундтық жекпе-жек қорытындысы бойынша бразилиялық спортшы төрешілердің шешімімен жеңіліс тапты. Соңғы жекпе-жегін Насименто 2023 жылы UFC Fight Night 217 турнирінде Карлос Эрнандеске қарсы өткізіп, қарсыласын сабмишн әдісімен (арқадан тұншықтыру) мерзімінен бұрын жеңді.\

Ал Асу Алмабаев UFC-дегі дебютін 2023 жылдың тамыз айында Одди Осборнды сабмишн әдісімен жеңіп бастады, ал 2024 жылы СиДжей Вергараны, Хосе Джонсонды және Матеус Николауды төрешілер шешімімен бірінен соң бірін жеңді.

30 жастағы қазақстандық спортшы ММА-да қатарынан 17 рет жеңіске жетіп келеді. Николауды жеңгеннен кейін бірден жеті сатыға көтеріліп, UFC-дің үздік 7 файтерінің қатарына кірді, бірақ қазір жеңіл салмақта UFC рейтингінде сегізінші орынға тұрақтаған.

Біздің парақшамыздан футбол матчтарының барлық нәтижелерін Live форматта бірінші болып біліңіз!