Астанадағы марафонға 5 мыңға жуық адам қатысты

Елордада жыл сайын өтетін Juregimnin Jenimpazy атты қайырымдылық жүгіру фестивалі ұйымдастырылды, деп хабарлайды Prosports.kz сайты inform.kz-ке сілтеме жасап.

Биыл ол еліміздің түкпір-түкпірінен келген 4,7 мың адамның басын қосты.

Іс-шараны Heart Center Foundation қоғамдық қоры ұйымдастырды. Ынтымақтастық туралы меморандум аясында қор жарыс қорытындысы бойынша Республикалық трансплантацияны үйлестіру орталығына 15 млн теңге көлемінде грант тапсырды.

Қатысушылар 1, 3 және 10 шақырымдық қашықтықты жүгіріп өтіп, ағза ауыстыруды күтіп отырған науқастарға қолдау көрсетті. Ресми деректерге сәйкес, Қазақстанда жүрек, бүйрек, бауыр немесе өкпе трансплантациясына 4 мыңнан астам адам мұқтаж. Оның ішінде 3 мыңнан астамы бүйрекке, ал 145-і жүрекке зәру.

Қордың негізін қалаушы, UMC басқарма төрағасы, белгілі кардиохирург Юрий Пя Қазақстанның Орталық Азиядағы трансплантация және қайтыс болғаннан кейінгі донорлық дамыған жалғыз ел екенін атап өтті.

— Біздің еліміз — Орталық Азиядағы трансплантация және қайтыс болғаннан кейінгі донорлық дамыған жалғыз мемлекет. Бұл — елдің даму деңгейінің көрсеткіштерінің бірі. Алғашқы жүрек трансплантациясы жасалғанына тура 13 жыл болды. Сол кезден бері ота саны айтарлықтай артты. Juregimnin Jenimpazy жобасы қоғамда донорлық туралы түсінікті қалыптастыру мақсатында өткізіледі, бұл оның құндылығын көрсетеді, — деді ол.

Жарысқа қатысушылардың қатарында дәрігерлер мен бейжай қарамайтын азаматтар ғана емес, донорлық орган трансплантациясын күту тізімінде тұрған диализдегі науқастар да болды.

Марафон қатысушысы Қанат Байбатыров шарадан қандай әсер алғанын айтты.

— Біз үшін бұл жай ғана спорт емес, өмірдің жалғасып жатқанын өзімізге еске салу мүмкіндігі. Мұндай шаралар күш береді, шабыттандырады және жаңа мақсаттар қоюға көмектеседі, — дейді ол.

Сонымен қоса 2022 жылы қайтыс болған донордан бүйрек алған Анар Шаймергенованың әңгімесі көпшілікті толқытты.

— Мен төрт жыл күттім және қоғамда қайтыс болғаннан кейінгі донорлық туралы ақпараттың аз екенін түсіндім. Бұл жүгіру адамдарға донорлықты еске салады: бұл — қалыпты жағдай, және ол көптеген өмірді сақтап қалады. Біз, күту парағындағы пациенттер — сіздердің көршілеріңіз, әріптестеріңіз, ұстаздарыңыз боламыз. Мұны мүмкіндігінше көп адамның білгені маңызды, — дейді ол.

Айта кетейік, Juregimnin Jenimpazy 2018 жылдан бері өткізіліп келеді. Ол алғашында небәрі 60 адам қатысқан шағын веложарыстан басталған еді. Бүгінде ол мемлекеттік секторды, бизнесті және мыңдаған жанашыр қазақстандықты біріктіретін ауқымды әлеуметтік қозғалысқа айналды.