«Астана» «Қайсарды» ойсырата жеңді

Қазақстан Премьер-лигасының кейінге қалдырылған 19-турындағы ойында «Астана» «Қайсарды» 5:1 есебімен жеңді. Есепті 19-минутта Александр Марочкин ашты, артынан 21-минутта Макс Эбонг басымдықты еселеді. Қызылордалықтардың үмітін 38-минутта Нұрдәулет Ағзамбаев қайта жандырып, айырманы қысқартты. Алайда алаң иелері екінші таймда үш гол соқты: 54-минутта Усман Камара, 57-минутта Назми Грипши, 61-минутта Марин Томасов мергендік танытты.

Осы нәтиже «Астананы» 46 ұпаймен турнир кестесінің бірінші орнына шығарды.

Бұл кездесу бастапқыда 3 тамызға жоспарланған еді, бірақ елордалық клубтың УЕФА Конференция лигасындағы қатысуына байланысты кейінге қалдырылған. «Астана» еурокубокта үшінші іріктеу кезеңінде Швейцарияның «Лозаннасына» (0:2, 1:3) жол беріп, жарыс жолын аяқтады.

Сонымен қатар, 22-турдағы «Оқжетпес» (Көкшетау) – «Қайрат» (Алматы) матчы да алматылықтардың еурокубоктық қатысуына байланысты 31 тамызға шегерілді. ҚПЛ-дың 23-тур ойындары 13–14 қыркүйекте өтеді.