«Ару-Астана» ВК vs «Грация KZ»: Ұлттық лиганың 3-турындағы басты текетірес

Бүгін Петропавлда әйелдер арасындағы волейболдан Ұлттық лиганың 3-туры аясында елордалық «Ару-Астана» клубы мен Оралдық «Грация KZ» командасы арасындағы матч өтеді, деп хабарлайды Sport Pulse.kz.
Бұл екі ұжым бір-бірін жақсы біледі: өткен жылы олар Жоғары лиганың ақтық сынында кездескен. «Ару-Астананың» бас бапкері Мейірбек Нұғұспанов алдағы матчқа қатысты пікір білдірді:

«Грация KZ — біз үшін ерекше қарсылас. Өткен жылы олар бізді Жоғарғы лиганың финалында жеңді. Ұлттық лиганың бірінші турында да жолымыз болмады, олардан тағы ұтылдық. Командалардың деңгейі тең: кей жерде біз мықтымыз, ал кей жерде олар мықтырақ. Бірақ психологиялық тосқауыл да бар сияқты. Бүгін бар күшімізді салып, жеңіске жетуге тырысамыз», — деді бапкер.

Қазіргі уақытта «Ару-Астана» тұрақты чемпионатта сегізінші орында тұр, ал «Грация KZ» тоғызыншы сатыда. Матч бүгін сағат 15:00-де басталады.
Айта кетейік, бұл «Ару-Астана» үшін 3-тур аясындағы екінші матч болмақ. Бірінші ойында елордалық волейболшылар павлодарлық «Ертіс» командасынан жеңілген. Қортынды есеп 3:2 (18:25, 25:20, 28:30, 25:23, 15:10).

«Бірінші кезеңде біз үздік ойын өрнегін көрсете білдік. Алайда, екінші партияны екінші құрам бастап, қойылған тапсырманы орындай алмады. Үшінші кезең шиеленісті өтіп, біздің пайдаға шешілді. Бірақ кейін қарсылас ширақтық танытып, төртінші партияда есепті теңестіре алды. Сондықтан, жеңімпазды тай-брейкте анықтауға тура келді. Өкінішке орай, жолымыз болмады. Қарсыластың күшін жете бағаламадық», — деп мойындады Нұғұспанов.