Артем Дзюба: «Футболда харизма жетіспейді, шабуылшылар азайды»

«Акрон» клубының шабуылшысы Артем Дзюба қазіргі футболдың көрермен үшін қызығы азайғанын айтты. Оның айтуынша, бұл харизмасы бар ойыншылардың азаюымен байланысты.

«Бұрын әр командада бес-алты шын мәнінде үздік ойыншы болатын. «Миланда» — Неста, Мальдини, «Челсиде» — Дрогба, Лэмпард, Терри, Иванович, Чех. Ал қазір «Челсиден» тек Палмер мен Нкункуды ғана білемін», — деді Дзюба.

Ол қазіргі футболшылар туралы ақпаратты көбінесе FIFA компьютерлік ойыны арқылы алатынын айтты. Сонымен қатар, классикалық орталық шабуылшылар санының азайып бара жатқанын да атап өтті.

«Қазір тоғыздықтар жойылып барады. Шын мәнінде үздік шабуылшылар жоқтың қасы. Левандовски, Лаутаро, Тюрам бар, бірақ бәрібір бұл бұрынғыдай емес», — деді шабуылшы.