Армандо Броя: «Ең жақсы ойындарым әлі алда»

«Эвертон» шабуылшысы Армандо Броя ауыр жарақаттан кейін алаңға қайта оралып, футболға деген сағынышын жеткізді. EvertonTV арнасына берген сұхбатында 23 жастағы албаниялық ойыншы денсаулығы жақсарғанын айтып, алдағы матчтарға деген сенімін білдірді.

«Қазір өзімді әлдеқайда жақсы сезінемін. Алаңға қайта оралып, ауырсынусыз ойнай алатыныма қуаныштымын. Мен тек осыны қалаған едім — жайсыздықсыз ойнау, футболдан ләззат алу, жанкүйерлер алдында өнер көрсету және командаға көмектесу», — деді Броя.

Ол «Челсиден» жалға келгеннен кейін жарақатына байланысты үш ай қатарынан жасыл алаңнан тыс қалған. Қазіргі таңда шабуылшы үш кездесуде қосалқы құрамнан алаңға шығып үлгерді, бірақ әлі гол соққан жоқ.

«Менен әлі де көп нәрсе күтуге болатынына жүз пайыз сенімдімін. Ең жақсысы әлі алда. Мен көп нәрсеге қабілеттімін», — деді Броя.

«Эвертон» маусым соңына дейін жеті матч өткізеді. Армандо Броя осы кездесулерде өзін жақсы қырынан көрсетіп, жазда тұрақты келісімшартқа ие болуды мақсат етіп отыр.

Біздің парақшамыздан футбол матчтарының барлық нәтижелерін Live форматта бірінші болып біліңіз!