АПЛ-дің 49 ойыншысы Африка ұлттар кубогына байланысты матчтарды өткізіп алуы мүмкін

BBC Sport хабарлағандай, алдағы 2025 жылғы Африка ұлттар кубогы ағылшын Премьер-лигасы командаларының құрамына айтарлықтай әсер етуі мүмкін. 2025 жылдың 21 желтоқсанынан 2026 жылдың 18 қаңтарына дейін Марокко елінде өтетін турнирге АПЛ-дің 49 футболшысы қатысуы мүмкін.

Турнир кезінде өз клубтарын тастап кететін негізгі ойыншылар арасында «Ливерпульдің» Мохамед Салахы мен «Манчестер Юнайтедтің» жаңа ойыншысы Брайан Мбуемо бар. Футболшылар чемпионаттың алты турын, сондай-ақ Англия Кубогы мен Лига Кубогының жартылай финалдық матчтарын өткізіп алады.

«Сандерленд» пен «Ноттингем Форест» — ең көп шығынға ұшырайтын клубтар: тиісінше жеті және алты ойыншы турнирге қатысуы мүмкін. Ал «Арсенал», «Астон Вилла», «Лидс» және «Ньюкасл» құрамында африкалық футболшылар жоқ.

Кот-д’Ивуар мен Сенегал — АПЛ-де ең көп өкілдігі бар елдер, сегіз-сегіз ойыншыдан. Нигерия жеті футболшымен оларды қуып келеді, ал ДР Конго, Камерун және Марокконың төрт-төрттен өкілі бар.