Англиядағы әйелдер футболы қарқынды қаржылық өрлеу кезеңінде

BBC Sport мәліметінше, Англиядағы әйелдер футболы айтарлықтай қаржылық серпіліс жасап, коммерциялық табыстың жаңа деңгейіне көтерілуде. Әйелдер Супер лигасының (WSL) клубтары кірістің үш негізгі көзіне сүйенеді: матчтан түсетін табыс, коммерциялық келісімшарттар және теле-трансляциялар.

Өткен маусымда WSL мен Әйелдер Чемпионшипі ойындарына келген жанкүйерлер саны алғаш рет бір миллионнан асты. Бұл көрсеткіш әйелдер командаларының ерлер стадиондарында ойнау мүмкіндігіне ие болуымен тікелей байланысты. Мұндай өсім демеушілердің назарын аударып, 2024 жылдың қыркүйегінде Barclays лиганың титулдық демеушілігін £45 миллионға ұзартуға ықпал етті.

Трансферлік нарықта да жаңа рекордтар орнауда. Chelsea клубы бұл үрдісті жалғастырып, 2025 жылдың қаңтарында америкалық қорғаушы Наоми Гирманды £900,000-ға сатып алып, әлемдік рекорд орнатты. Бір апта өткен соң, команда Англия құрамасының жартылай қорғаушысы Кейра Уолшты алты таңбалы сомамен қатарға қосты.

Қаржы сарапшысы Кристина Филиппу бұл өзгерістердің клубтық стратегияға әсерін былай түсіндірді:

«Клубтағы үлесті сату үшін табыстың тұрақты өсуін көрсету қажет. Ал қымбат ойыншыларды сатып алу – осы мақсатты жүзеге асырудағы маңызды қадамдардың бірі.«

Дегенмен, қаржылық өрлеуге қарамастан, сарапшылар чемпионаттағы үздік клубтар мен қалған командалар арасындағы алшақтықтың артуына алаңдаушылық білдіруде. Бұл теңсіздік ұзақ мерзімді перспективада лигаға деген қызығушылыққа кері әсер етуі мүмкін.