Андрей Рублев Марат Сафинмен жұмыстың алғашқы әсерімен бөлісті

Танымал ресейлік теннисші Андрей Рублев жаттықтырушы ретінде Марат Сафинмен ынтымақтастықтың алғашқы күндері жайлы пікір білдірді, деп хабарлайды «Больше!» YouTube арнасы.

Қазіргі таңда Рублев Монте-Карло турниріне қызу дайындалып жатыр. Келесі айналымда ол Гаэль Монфис пен Фабиан Марожан арасындағы кездесудің жеңімпазымен кортқа шығады.

«Өзімді жақсы сезінемін, дайындалып жатырмын. Қазір басты мақсатым — өз ойынымды жетілдіру. Сол себепті тек жақсарту керек тұстар туралы ойлауға тырысамын, басқа ештеңе маңызды емес», — деді Рублев.

Ал Марат Сафин шәкірті туралы былай деп пікір білдірді:

«Мен оған бағыт-бағдар бере аламын, бірақ сол жолмен өзі жүруі керек. Ол үшін еңбек ету керек».

Рублев жаттықтырушысының пікіріне толық келісетінін айтып, алдағы табыс пен даму тек өзінің ынтасы мен күш-жігеріне байланысты екенін жеткізді.