«Алтын доп» иегері Родри ауыр жарақаттан кейін алаңға оралды

«Манчестер Сити» жартылай қорғаушысы Родри тізе жарақатынан кейін сегіз айлық үзілістен соң алаңға оралды — ол «Борнмутқа» қарсы ойынның 83-ші минутында Эрлинг Холандты алмастырып, «қалалықтардың» 3:1 есебімен жеңіске жетуіне үлес қосты.

Испаниялық футболшы қыркүйекте «Арсеналмен» болған ойында крест тәрізді байламдарын үзіп алған — содан бері «Манчестер Сити» көшбасшылықтан айырылып, чемпиондық атақты «Ливерпуль» мерзімінен бұрын жеңіп алды.

«Фулхэмге» қарсы соңғы тур алдында Пеп Гвардиола командасы турнир кестесінде үшінші орында тұр — Чемпиондар лигасына өту үшін «қалалықтарға» «Крейвен Коттеджде» тең ойын жеткілікті.

Еске сала кетейік, Родри 2024 жылы Испания құрамасымен Еуропа чемпионатын, ал «Манчестер Ситимен» Премьер-лига, УЕФА Суперкубогы және клубтық әлем чемпионатын жеңіп, «Алтын допқа» ие болған.