Алонсо V10 қозғалтқыштарының қайтарылуына қарсы: «Қазір басқа заман»

Фернандо Алонсо — V10 қозғалтқышы бар болидтерді тізгіндеген Формула-1-дегі жалғыз белсенді пилот. Алайда ол бұл қуатты агрегаттардың корольдік автоспортқа қайта оралуына қарсы пікір білдірді.

«Әрине, мен V10 және V8 дәуірін жақсы көремін, бәріміз сол көліктердің дыбысын сағынамыз. Бірақ қазір басқа уақыт. Технологиялар дамыды. Қазір бізде үш есе аз отын тұтынатын өте тиімді қозғалтқыштар бар», — деді испандық ардагер.

V10 қозғалтқыштарының экологиялық отынмен қайта пайда болуы туралы пікірталас FIA президенті Мохаммед Бен Сулайемнің 2028 жылға қарай осындай мүмкіндікті меңзеген мәлімдемесінен кейін қыза түсті. Айта кетейік, 2026 жылдан бастап Формула-1 жаңа гибридті қондырғыларға көшуді жоспарлап отыр.

Өндірушілер бұл жаңа кезеңге тыңғылықты дайындалып жатыр. Мәселен, Sauber командасын сатып алған Audi 2026 жылғы регламентті толықтай қолдайды және жаңа қуат қондырғыларын әзірлеуге қомақты инвестиция құйды.

FIA-ның ашық дөңгелекті жарыстар жөніндегі директоры Николас Томбазис кез келген өзгеріс тек барлық тараптардың келісімімен ғана жүзеге асатынын атап өтті.

«Біз алға жылжудамыз. Қазір Формула-1 даму кезеңінің өте жақсы сатысында тұр. Жаңа нәрсе ойлап табу қиын, бұл бізді белгісіздікке жетелеуі мүмкін», — деп түйіндеді Алонсо.