Әлемнің жетінші ракеткасы Мирра Андреева кәмелет жасқа толды

Бүгін әлемдік рейтингте жетінші орын алатын ресейлік теннисші Мирра Андреева 18 жасқа толды.

Жас спортшының қоржынында үш WTA титулы бар, оның екеуін ол биылғы маусымда беделді WTA 1000 турнирлерінде жеңіп алды. Андреева әсерлі нәтиже көрсетті — Дубай мен Индиан-Уэллсте қатарынан жеңіске жетті, бұл соңғы бес жылда тек Ига Швентекке ғана бұйырған еді.

Индиан-Уэллс турнирінде ресейлік спортшы тарихи жетістікке қол жеткізді — 1999 жылғы US Open-дағы Серена Уильямстан кейін бір турнирде топ-2 қарсыластарын жеңген 18 жасқа толмаған алғашқы теннисші атанды.

Жұптық разрядта Мирра Андреева Диана Шнайдермен бірге 2025 жылы екі турнирді — Брисбендегі WTA 500 және Майамидегі WTA 1000 турнирлерін жеңіп алды. Сондай-ақ, бұл жұп Париж Олимпиадасында күміс медаль иеленді. Андрееваның Үлкен дулыға турнирлеріндегі ең үздік нәтижесі — өткен жылғы Ролан Гаррос жартылай финалы.