Александр Недовесов ұлттық құрамадағы манбасын аяқтады

2-ші ақпанда Астанада танымал қазақстандық теннисші Александр Недовесовты ұлттық құрамадан шығарып салу рәсімі өтті. 37 жастағы спортшы ұлттық құрамадағы мансабын ресми түрде аяқтап, Қазақстан теннисі тарихында айтарлықтай із қалдырды.

Қоштасу рәсімі: алғыс пен эмоциялар

Дэвис кубогының Қазақстан мен Пәкістан арасындағы жұптық матчы басталар алдында Ұлттық теннис орталығында Александр Недовесовты салтанатты шығарып салу рәсімі өтті. Қазақстан теннис федерациясының вице-президенті Диас Досқараев спортшының елдегі теннистің дамуына қосқан үлесін атап өтті:

«Александр – жас буынға нағыз үлгі. Ол ұлттық құрама үшін көп еңбек сіңіріп, маңызды жеңістерге қол жеткізді. Енді ол бапкерлік қызметін қолға алып, бай тәжірибесін болашақ қазақстандық теннисшілермен бөлеспек».

Өз кезегінде Александр өз отбасы мүшелеріне, Қазақстан теннис федерациясына, командадағы серіктестеріне және жанкүйерлерге шынайы алғысын білдірді:

«Ата-анама, отбасыма, бапкерлеріме, командама және жанкүйерлерге алғысым шексіз. Ұлттық құрамадағы жылдарым ұмытылмас сәттерге толы болды».

Ұлттық құрамадағы мансабы: жарқын жеңістер мен рекордтар

Александр Недовесов Қазақстан құрамасы сапында 2014-ші жылдан бастап өнер көрсетті. Ол 2014-ші жылғы Азия ойындарында командалық есепте алтын, 2018-ші жылғы Азия ойындарында микст санатында қола жүлде жеңіп алды. Сондай-ақ биыл Париж Олимпиадасына да қатысқан.
ATP турнирлерінде ол айтарлықтай жетістіктерге қол жеткізіп, ATP 250 санатындағы жұптық сындағы турнирлерде үш рет жеңіске жетті. ATP-дің жекелей рейтингінде оның ең жоғары көрсеткіші – 72-ші орын (2014-ші жыл), ал жұптық разрядта – 38-ші орын (2024-ші жыл).
Оның мансабындағы ең есте қаларлық сәттердің бірі – 2014-ші жылғы Дэвис кубогындағы матч. Ол Андрей Голубевпен бірге атақты швейцариялық теннисшілер Роджер Федерер мен Стэн Вавринканы тізе бүктірді.
Қазақстан құрамасы сапында Дэвис кубогында Александр 28 матч өткізді: 22 матч жұптық сында, 6 матч жекелей сайыста.

Алдағы жоспарлар: бапкерлік мансапқа көшу

Александр Недовесов Қазақстан құрамасы сапындағы мансабын аяқтағанымен, тенниспен қош айтыспайды. Ол Қазақстан теннис федерациясының бапкерлік штабына ресми түрде қосылды.

«Мен теннисте қаламын және жас ойыншыларға көмектесемін», – деді Недовесов.

Қорытынды

Александр Недовесовты шығарып салу рәсімі әріптестерін, жанкүйерлерді және теннис қауымдастығының өкілдерін біріктірген әсерлі оқиға болды. Оның Қазақстан теннисіне қосқан үлесі зор, ал оның тәжірибесі мен білімі болашақ теннисшілер үшін баға жетпес ресурс болмақ.

Сөз соңында Александр теннис өмірінде әрдайым маңызды орын алатынын айтты:

«Теннис – менің 30 жылдық жолым, менің шынайы құштарлығым. Мен «қош бол» емес, тек «сау бол» деймін».

Sport Pulse ұжымы Александрға зор денсаулық, қуат және жаттықтырушы рөлінде жаңа жеңістер тілейді!