Алекс Албон мен Тайланд премьері F1 кезеңін Бангкокта өткізу мүмкіндігін талқылады

«Williams» командасының тай-британдық пилоты Александр Албон Бангкокта Формула-1 кезеңін өткізу перспективасын талқылау үшін Тайланд премьер-министрі Паетонгтарн Шинаватрамен кездесті. Бұл туралы Sky Sports F1 хабарлады.

Кездесу бұрынғы келіссөздердің жалғасы болды — наурыз айының басында Формула-1 басшысы Стефано Доменикали жарысты Тай үкіметімен алғаш рет талқылаған болатын.

Тайланд Формула-1 күнтізбесіне енуге ұмтылып отырған елдердің қатарында. Бұл тізімде Аргентина мен Африкадағы әлеуетті кезеңдер де бар.

«Соңғы жылдары біз Формула-1-дің болашағын білдіретін орындарға назар аударып келеміз. Әлемнің түкпір-түкпірінен қызығушылық жоғары», — деді Доменикали.

«McLaren» басшысы Зак Браун чемпионат географиясын кеңейту үшін мынадай ұсыныс білдірді:

• 20 тұрақты кезең

• 8 ротациялық кезең (жыл сайын кезектесіп өткізіледі)

• Маусымда жалпы 24 жарыс сақталады

Бұл схемаға алғашқылардың бірі болып Бельгия Гран-приі қосылды. 2031 жылға дейінгі келісім бойынша, ел 2029 және 2030 жылдары жарыс өткізбейді.