Челси бас бапкері шектен тыс қуанғаны үшін жазаға тартылды

Football Association мәліметінше, «Челсидің» бас бапкері Энцо Мареска «Ливерпульмен» ойында алаңнан қуылғаннан кейін бір матчқа шеттетілді.

Италиялық маман төреші Энтони Тейлордан матчтың 95-ші минутында Эстевао Виллианның жеңіс голын тойлау кезінде техникалық аймақтан шыққаны үшін екінші сары қағазын алды.

Англияның футбол қауымдастығы «көктердің» жаттықтырушысына 8 мың фунт стерлинг айыппұл салды — Мареска айыптауларды мойындап, жазаға келісті. «Ноттингем Форестке» қарсы алдағы матчта оның міндеттерін көмекшісі Вилли Кабальеро атқарады.

45 жастағы бапкер үшін бұл Премьер-лигадағы жұмысын бастағалы бері алаң шетінде болуға екінші тыйым — алдыңғы шеттетуді ол жарты жыл бұрын «Фулхэммен» матчта гол тойлағаннан кейін өтеген болатын.