Қазақстан құрамасының келесі қарсыласы Бельгиядан ұпай тартып алды

2026 жылғы әлем чемпионатының іріктеу кезеңі аясындағы матчта Солтүстік Македония құрамасы Брюссельде Бельгиядан ұпай тартып алды, деп хабарлайды Sport Pulse.

Кездесу 0:0 есебімен аяқталды. Ойын барысында бельгиялықтар допқа иелік етудің 80 пайызын өз бақылауында ұстап, қақпаға 25 соққы бағыттағанымен, есеп аша алмады.

Бұл нәтижеден кейін Солтүстік Македония 6 матчтан кейін 12 ұпай жинап, J тобында көш бастап келеді. Бельгия 11 ұпаймен екінші орында, бірақ бір матчты кем өткізген. Үшінші орында 10 ұпаймен Уэльс тұр.

Төртінші орында — 6 ұпай жинаған Қазақстан құрамасы. 10 қазанда қазақстандықтар Лихтенштейнді 4:0 есебімен ойсырата жеңген болатын.

Келесі матчта Қазақстан құрамасы 13 қазан күні сырт алаңда Солтүстік Македониямен кездеседі.