Рэтклифф Аморинге МЮ-де өзін дәлелдеуге үш жыл берді

«Манчестер Юнайтед» клубының бірлескен иесі сэр Джим Рэтклифф The Times подкастында бас бапкер Рубен Аморинге өзінің қабілетін дәлелдеу үшін үш жыл беретінін мәлімдеді.

Өткен жылдың қарашасында команданы қабылдаған португал маман әзірге әсерлі нәтижелер көрсете алмай келеді — клуб 1974 жылдан бері чемпионаттағы ең нашар орынға ие болып, Лига кубогынан шығып қалды.

«Оның маусымы сәтті болмай тұр, бірақ Рубенге ұлы бапкер екенін дәлелдеу үшін шамамен үш жыл уақыт қажет. Менің ұстанымым осындай», — деді Рэтклифф.

Акциялардың аз бөлігіне ие болса да, клубтағы футболдық шешімдерді бақылайтын Ineos иесі баспасөзді дереу нәтиже талап еткені үшін сынға алып, бапкердің ықтимал отставкасы туралы қауесеттерді жоққа шығарды.

Соңғы қаржы жылында клуб персоналды оңтайландыру арқылы шығынды 113,2-ден 33 миллион фунтқа дейін қысқартты — Рэтклифф «Манчестер Юнайтед» әлемдегі ең табысты футбол клубына айналатынына сенімді.