«Барыс» жаңа маусым алдындағы алғашқы текетіресте жеңіске жетті

Астанада өткен бақылау кездесуінде «Барыс» хоккей клубы ресейлік «Сібір» командасынан 3:1 есебімен басым түсті.

Матчтың 22-минутында Кирилл Савицкий Әлихан Өмірбековтің дәл пасын голға айналдырып, есепті ашты. Сол сәттен көп ұзамай Джейк Масси мергендігімен көзге түсіп, елордалық клубты алға жетеледі. Қонақтар сапынан Скотт Уилсон 29-минутта бір шайбамен жауап қатты. Дегенмен, 58-минутта Әлихан Әсетов шешуші голын соғып, ойынды түйіндеді.

Осылайша, «Барыс» жанкүйерлеріне жаңа маусым қарсаңында қуаныш сыйлады. Екі клуб арасындағы екінші матч 2 қыркүйек күні 18:00-де өтеді.

Айта кетейік, қазақстандық команда ҚХЛ-дағы алғашқы үш ойынды өз алаңында өткізеді: 7 қыркүйекте — «Трактормен», 9 қыркүйекте — «Амурмен», ал 13 қыркүйекте — «Динамо-Минскімен» күш сынасады.