Рафаэль Уразбахтин «Селтикке» қарсы өтетін ойын жайында өз пікірімен бөлісті

Алматының «Қайрат» клубының бас бапкері Рафаэль Уразбахтин Чемпиондар лигасының плей-офф кезеңіндегі шотландиялық «Селтикке» қарсы өтетін ойын алдындағы күтулерін бөлісіп, сондай-ақ командадағы кадрлық шығындар туралы пікір білдірді.

— Бұл бүкіл Қазақстан үшін, біздің клуб үшін, қала үшін, жанкүйерлер үшін өте үлкен оқиға. Чемпиондар лигасының біздің қалаға келіп жатқанын біз зор қуанышпен қабылдап отырмыз. Бұл — біз үшін үлкен мереке. Сондықтан осы кездесуді асыға күтіп отырмыз және жанкүйерлердің қолдауына сенеміз. Әрине, жанкүйерлерді жақсы ойынмен қуантуға да үміттіміз.

Өкінішке қарай, кадрлық мәселелер бар. Құрамда болмайтын жігіттердің әрқайсысы біз үшін үлкен жоғалтулар. Бірақ олардың орнына алаңға шығатын ойыншылар өз мүмкіндіктерін көрсетуге тырысады деп сенемін. Балалар бұл мүмкіндікті пайдаланады деп ойлаймын. Біз қазірдің өзінде оларды кімдер алмастыратынын анықтап қойдық, — деді маман баспасөз конференциясында.