Алматы әкімі Орталық стадионды жаңғыртуды тапсырды

Алматы әкімдігінің баспасөз қызметінің хабарлауынша, Дархан Сатыбалды оңтүстік астананың басты спорт аренасы — Орталық стадионға инспекция жүргізді.

Нысан басшылығы аренаны халықаралық стандарттарға сәйкес жаңғырту қажеттігі туралы баяндады — бұл ретте жеңіл атлетика инфрақұрылымы сақталуы тиіс. Стадионның сыйымдылығы соңғы жылдары 35 мыңнан 23 мың көрерменге дейін қысқарған.

«Орталық стадионды ретке келтіру қажет. Санитарлық тораптардан бастап стадион айналасындағы жаяу жүргіншілер жолдарына дейін барлығын қалпына келтіру керек. Бұл маңызды қоғамдық нысан және ол заманауи талаптарға сай, қала тұрғындары үшін ыңғайлы, қауіпсіз және қолжетімді болуы керек», — деді қала басшысы.

Нысанды жаңғырту аясында барлық билет операторларын біріктіре отырып, билеттерді есепке алудың цифрлық жүйесін енгізу жоспарлануда. Орталық стадион «Қайрат» футбол клубының базалық аренасы болып табылады.