Самсонова алғаш рет Үлкен дулыға турнирінің ширек финалына шықты

Әлемнің 19-шы ракеткасы Людмила Самсонова Уимблдонның шөпті корттарында тарихи жетістікке қол жеткізді.

Ресейлік теннисші Джессика Бусас Манейроны екі сетте — 7:5, 7:5 есебімен жеңіп, мансабында алғаш рет Үлкен дулыға турнирінің ширек финалына шықты.

Бұған дейін 26 жастағы спортшы бірнеше ірі турнирлерде төртінші кезеңде тоқтап қалған — 2021 жылғы Уимблдон, 2022 және 2024 жылғы US Open, сондай-ақ жақында өткен Ролан Гаррос турнирлерінде.

Жартылай финалға шығу жолындағы күресте Самсонова Ига Швентек пен Клара Таусон арасындағы кездесу жеңімпазымен кездеседі.