18 жастағы Ливерпульдің жаңа ойыншысы тұсаукесер матчында ауыр жарақат алды

«Ливерпульдің» бас бапкері Арне Слот қорғаушы Джованни Леонидің алдыңғы крест тәрізді байламының үзілуіне байланысты бір жылға шеттетілгенін хабарлады. 18 жастағы футболшы Лига кубогындағы «Саутгемптонға» қарсы тұсаукесер матчында жарақат алды.

«Жағдай өте күрделі — оның крест тәрізді байламы үзілді, бұл бір жылдық үзілісті білдіреді. Жаңа елге келген және алғашқы ойында өзін жақсы көрсеткен жас ойыншы үшін бұл ауыр соққы», — деді Слот.

Леони тамыз айында «Пармадан» «Ливерпульге» 26 миллион фунтқа ауысты. Енді Слоттың қарамағында тек үш орталық қорғаушы қалды — Вирджил ван Дейк, Ибрагима Конате және Джо Гомес.

Жас италиялық мансабын үшінші дивизионда «Падова» үшін бастап, екі жылдан кейін Премьер-лигаға келді. Чемпиондар лигасының тізімінде оны Федерико Кьеза алмастырады.