Франция – Испания: Олимпиада төрінде кім топ жарады?

Парижде өтіп жатқан Олимпиада ойындарында футболдан финалда Франция мен Испания құрамалары кездеседі. SportPulse тілшісі тарихи текетіресті не үшін көру керек екенін дәлелдеп беруге тырысады.

Финал жұма күні, яғни 9 тамызда Париждегі «Парк де Пренс» стадионында өтеді. Даңқты Тьерри Анри баптайтын «үштүстілер» жарыс қожайыны ретінде алтын алуға тырысатыны анық. Финалға дейін француздар өз қақпасына тек бір гол жіберген. Десе де Испания құрамасы әрбір ойынында көп гол соғып қана қоймай, біраз гол да жіберген. 

40 жылдан бері алғаш рет Франция құрамасы Олимпиада ойындарының финалына жолдама алды. Соңғы рет Франция 1984 жылы Лос-Анджелесте өткен Олимпиадада топ жарған еді. Ол уақытта Бийот, Гаранде, Лакомба мен Сюэреба бастаған жігіттер алтын медаль алған еді. Ал Испания құрамасы болса, француздардан 8 жыл кеш Олимпиада чемпионы атанған. «Қызыл фурия» 1992 жылы өз жерінде өткен Олимп ойындарында атой салды. Қай құрама үшін де бұл жолы екінші мәрте Олимпиада чемптоны атануға мүмкіндік бар. 

Қос құрамада Олимпиаданың ең басты футбол жұлдыздары бар екенін ұмытпау керек. Дәл қазір Франция олимпиадалық құрамасының басты жұлдызы – Александр Лаказетт. Тәжірибелі шабуылшы құрамасын олимп шыңына шығарсам дейді. Одан бөлек, «Бавариядан» Майкл Олисе, «Кристал Пэласта» ойнайтын Жан-Филипп Матетаны айта кеткен жөн. 

Испания құрамасы кіл жастардан тұрса да, атағы жер жарып тұр. Жақында ғана Еуропа чемпионатында топ жарған Испания құрамасы жас ойыншыларын Олимпиадаға жіберген. Оның ішінде «Барселонаның» жартылай қорғаушысы Фермин Лопес бар. Сондай-ақ жартылай қорғаушы Алекс Баэна мен 17 жасар қорғаушы Пау Кубарсиден көп үміт күтеді жанкүйерлер. 

Сандар сөйлесін:

– екі құрама Олимпиада ойындарында 1996 жылы кездескен: топтық кезең аясында өткен мат 1:1 есебімен аяқталды.

– бірақ қос команда да сол жылы Олимпиаданың финалына жете алмады.

– соңғы үш Олимпиаданың финалында қос команда да гол соғып отырған.

– Франция осы жарыста АҚШ-ты (3:0), Гвинеяны (1:0), Жаңа Зеландияны (3:0), Аргентинаны (1:0) және Мысырды (3:1 қосымша уақыт) жеңді;

– Испания Өзбекстанды (2:1), Доминиканды (3:1), Жапонияны (3:0) және Марокконы (2:1) жеңіп, Мысырға (1:2) есе жіберген;

– француздар бес матчта бір ғана гол жіберді;

– испаниялықтар бес матчтың төртеуінде гол жіберген;

– өткен Олимпиадада Франция құрамасы топтан шыға алмады;

Фото: rappler.com, si.com